- La Hoya errekaren ibilgua hobetzeko eta lehengoratzeko obrak egin nahi dira: uholdeak ematen baitira eremuan, eta udalerriko hiru upategitan eragiten dute
- Ibaiertzeko landaredia berreskuratuko da, ibilguaren ahalmena handituko da, eta ibaiaren gaineko pasabide bat ordeztuko da
URAk Guardiako La Hoya erreka hobetzeko eta ibaia lehengoratzeko obrak egingo ditu 300 metroko tarte batean. Obra horien bidez, uholde-gertakariei erantzun nahi zaie, hala nola 2023ko ekainaren 19an eta, neurri txikiagoan, irailaren 2an, izandako prezipitazio handietako gertakariei.
Guardiako hirigunearen ipar-mendebaldean dagoen La Hoya erreka izan zen afekzio gehien eragin zituen eskualdeko ibai-ibilgua, ibilguaren bi ertzetan kokatutako hiru upeltegi-instalazio urez betez (Zintxo, Javier San Pedro eta Casa Primicia).
Zaharberritze-proiektuaren helburua da La Hoya ibaiaren tartearen hustubide-ahalmena handitzea, aipatutako upeltegien mugak zeharkatzen baititu; eta ibaiertzeko landaredia berreskuratzea 300 metro inguruko tarte batean.
Zehazki, Javier San Pedro upeltegiaren eskuineko ertzerantz doan tartean ibilguaren zabalera handitzea aurreikusten da, baita zati osoan landaketak egitea ere. Casa Primicia upategiaren eremuan, ibilguaren edukiera handitzea, ibaiaren gaineko pasabide bat ordeztea eta ertzak landareztatzea ere aurreikusten da.
Obrak Udalarekin lankidetzan egingo dira, URAk horretarako behar dituen lurzoruak izan ondoren. Aurreikusitako kostua 80.000 €-koa izango da.
Proiektu honek Eskualde Garapenerako Europako Funtsaren (EGEF-FEDER 2021-2027) finantziazioa jasotzen du.