- Araudiak, ordea, zubiaren titularrari esleitzen dio segurtasun hidraulikoa arriskuan jar dezaketen oztopoak kentzeko betebeharra
- Lopez Etxebarria "URAk gogorarazi du prebentzioa funtsezkoa dela uholde-arriskua murrizteko, eta administrazioen arteko lankidetza ezinbestekoa dela herritarrak eta lurraldea babesteko"
URA-Uraren Euskal Agentziak enborrak eta landare-hondarrak kendu ditu atzo Trespondeko (Araba) zubi-begietatik, husteko gaitasuna berrezartzeko eta euri-denboraldiaren aurrean arriskuak murrizten laguntzeko. Egindako inbertsioa 8.000 €-koa izan da.
Araudia argia da: 849/1986 Errege Dekretuaren 126 ter artikuluaren 6. atalak ezartzen du jabari publiko hidraulikoaren gaineko azpiegituren titularrek egin behar dituztela sekzio hidraulikoaren mantentzea bermatzeko behar diren kontserbazio-lanak. (Nolanahi ere, azpiegitura horien titularrek behar diren kontserbazio-lanak egin beharko dituzte, azpiegitura horien hustubide-ahalmena mantentzen dela bermatzeko. Horretarako, partikularrek kontserbazio-ekipoei beren jabetzetarako sarbidea erraztuko diete, eta ezin izango dute azpiegituren drainatze-ahalmena gutxituko duen jarduerarik egin. Titular horiek urte anitzeko programak egin ahal izango dituzte, horiek eta lotutako ibilguak kontserbatzeko eta mantentzeko. Arroko erakundeak aldeko txostena eman ondoren, ez da beharrezkoa izango baimenak edo erantzukizunpeko adierazpenak izapidetzea jarduketak garatzeko, eta arroko erakundeari soilik jakinarazi beharko zaizkio urte horretarako aurreikusitako jarduketak eta aurreko urtean egindakoak).
Beraz, zubiaren titularrari dagokio segurtasun hidraulikoa arriskuan jartzen duten oztopoak kentzeaz arduratzea. Titulartasuna argi zehaztu gabe dagoenean, egituraren gainean dagoen igarobidea edo komunikazioa mantentzen duenari dagokiola ulertzen da.
Izan ere, araudia betez, hainbat dira zubien sekzio hidraulikoa mantentzen duten Udal Administrazio Batzarrak: Langraiz Oka, Pobes, Hereña, Ribabellosa, Igai edo Berganzo, besteak beste.
Era berean, URAk larrialdi-egoeretan esku hartzen du, batez ere euri-jasak aurreikusten direnean, husteko gaitasuna nabarmen murriztu dezaketen (metakinak pilatzearen ondorioz) buxatutako zubietako begiak (titularrek kendu ez dituztenak) askatzeko. Trespondeko zubiaren begietan egurra eta tamaina handiko enborrak pilatzea kezkagarria denez, eta titularrak ezer egin ez duenez, URAk bere gain hartu ditu lanok, euri mardulen sasoi hasi berrira begira, ur-laminaren hazaraztea mugatzeko.
Egoera hori ez da berria: arriskuak prebenitzeko araudia betetzearen garrantziaz ohartarazi du Agentziak. Horri dagokionez, URAko zuzendari Asier López Etxebarriak "biziki deitoratzen du zubiaren titularraren gelditasuna, azpiegituraren segurtasun hidraulikoa bermatu beharko lukeelako", eta gogorarazi du "prebentzioa funtsezkoa dela uholde-arriskua murrizteko, eta administrazioen arteko lankidetza ezinbestekoa dela herritarrak eta lurraldea babesteko".
2012tik URA Trespondeko zubiaren sekzio hidraulikoa zaintzera joan da 50.000 euroko balioarekin. Gainera, 2015ean sedimentu metatuak kendu ziren, eta 180.000 euro inguruko kostua izan zuten. Era berean, egunotan Momario eta Tresponde arteko tartean hildako edo erortzeko gertu dagoen egurra kenduko dira, zubiaren parean berriro pilatzea saihesteko.