Joan edukira

URAk urtarrilaren 23ko astetik aurrera jendaurrean jarriko du Aranguren Cadagua ibaiaren uholdeetatik babesteko proiektua

Argitalpen-data: 

URAko zuzendari nagusi Antonio Aiz, Arangureneko proiektuaren aurkezpenean Zallan
  • Proiektuaren dokumentazioa URAren webgunean egongo da eskuragarri, eta alegazioak Eusko Jaurlaritzaren erregistro elektroniko orokorrean edo Uraren Euskal Agentziaren bulegoetan aurkeztu ahal izango dira 
  • Proiektua aztertzeko eta alegazioak aurkezteko epea 30 baliodun egunekoa da 

Eusko Jaurlaritzako Ekonomiaren Garapen, Jasangarritasun eta Ingurumen Sailari atxikitako URA-Uraren Euskal Agentziak urtarrilaren 23ko astetik aurrera jendaurrean jarriko du Zallako Aranguren auzotik igarotzean Cadagua ibaiaren uholdeei aurre egiteko proiektua, 2.440 metroko ibai-tartean, Gueñesko udal-mugartearekin duen mugatik Baular auzoko merkataritza-eraikinen eremuraino, non Mimetiz bideratzeko dagoeneko egin diren obrekin lotzen den. 

Proiektuaren dokumentazioa URAren webgunean egongo da eskuragarri, eta alegazioak Eusko Jaurlaritzaren erregistro elektroniko orokorrean edo Uraren Euskal Agentziaren bulegoetan aurkeztu ahal izango dira. Proiektua aztertu eta alegazioak aurkezteko epea 30 baliodun egunekoa da, aldizkari ofizialean argitaratzen denetik hasita. 

Tarte horrek uholde errepikakorrak ditu, egungo ibilguak ur-goraldien emariei eusteko ahalmen nahikorik ez duelako. Egoera hori areagotu egiten da eremu jakin batzuetan oztopo puntualak daudelako, bai ibilguan bertan, baita trenbideko zubiek ibaiaren ibilguaren sekzioa mugatzen dutelako ere. 

Egoera horri aurre egiteko, Aranguren uholdeetatik babesteko proiektuak sekzio handiagoa eman nahi dio ibilguari. Zehazki, ibilguaren sekzio hidraulikoa zabaldu nahi da, ohiko ibilguaren ondoan hedapen-zona bat sortuz, 4,5 eta 18 metro arteko zabalera aldakorrekoa, 400 metro inguruko tarte batean, trenbidetik ibaian gora dagoen zubira arte. 

Halaber, ubidea zabalduko da ezkerraldean, eta beste hedapen-eremu bat irekiko da paper-fabrikaren HUAren kurbarantz; uholde-ibilgu bana eraikiko da Ojivar auzoaren eskuinaldean eta Oreña auzoaren ezkerraldean, hurrenez hurren; paper-fabrikaren presa txikia jaitsiko da eta luzetarako ubideak edo defentsak eraikiko dira, bai San Juan auzoaren ezkerraldean ibaian gora, bai Mimétiz meandroan, El Baular auzoko merkataritza-gunearen altueraraino; eta BI-636 errepideko sarbide-zubiaren parean ibilgua irekiko da.

Behin betiko proiektuak Trantsizio Ekologikorako eta Erronka Demografikorako Ministerioaren Biodibertsitate Fundazioaren (MITECO) laguntza izango du, Europar Batasunak finantzatutako Berreskuratze, Eraldaketa eta Erresilientzia Planaren (PRTR) esparruan - NextGenerationEU.

Arangureneko proiektuaren aurkezpena Zallako frontroian

Bilatu URAn